Бүгүн Арылаах, Болтоҥо уонна Бахсы орто оскуолаларыгар саҥа цифровой кабинеттар үөрүүлээхтик аһылыннылар.
«Үөрэхтээһин» национальнай бырайыак чэрчитинэн 2020 сылтан «Цифровая образовательная среда» федеральнай бырайыак нөҥүө тыа оскуолаларыгар түргэн интернеттээх цифровой эйгэ тэриллэр. Бырайыакка күн бүгүн улуус 8 оскуолата киирэн олорор. Манна сенсорнай интерактивнай системалаах, аныгы ноутбуктаах, түргэн интернеккэ холбоммут кабинеттар тэриллэллэр. Үөрэнээччилэр, учууталлар цифровой үөрэтэр платформаларга киирэн дойду биллиилээх учууталларыгар, учуонайдарыгар үөрэнэр кыахтаннылар. Дистанционнай, сетевой үөрэх ныматынан эбии үөрэхтээһин тэриллэр. Ол курдук Дириҥ агрооскуолата эбии үөрэхтээһиҥҥэ агротехнологическай хайысха программатынан улуус үөрэнээччилэригэр сертификаттаах үөрэҕи тэрийдэ, Сылаҥ оскуолата Дьокуускайдааҕы медколледжы кытта дуогабардаһан ыарыһахтары көрөр-харайар алын медицинскэй сиэстэрэ идэтигэр оҕолору үөрэттэрэр. Оскуола отчетнаһа, педагогтар аттестациялара, үөрэхтэрин үрдэтиилэрэ барыта биир информационнай-цифровой системаҕа киирэригэр үлэ барар.
Быйыл саҥа киирэр оскуолалар брендбукка сөп түбэһэр өрөмүөн үлэтин ыыттылар, анал миэбэли атыыластылар. СӨ Үөрэҕин уонна наукатын министиэристибэтэ аныгы компьютернай техниканан хааччыйда. Бу тэриллибит эйгэ оҕолорбут куорат оскуолаларын оҕолоруттан хаалсыбакка тэҥҥэ күрэстэһэр билиилээх-көрүүлээх буолаларыгар, дьоҕурдарын, сатабылларын сайыннаралларыгар кыах биэриэ диэн бигэ эрэнэбит.
