Билим — кэскилгэ хардыы

Новости

Сэтинньи 30 күнүгэр XXIII төгүлүн ыытыллар научнай-практическай “Инникигэ хардыы” кэмпириэнсийэ улуустааҕы түһүмэҕэ эдэр чинчийээччилэри түмэ тарта.

Чурапчы улууһун үөрэҕин салалтата, С.К. Макаров аатынан Чурапчы гимназията, СӨ наукатын дьоҕус академията уонна Хотугулуу-Илиҥҥи Федеральнай университет иилээн-саҕалаан ыыттылар.

Чурапчы улууһун нэһилиэктэрин оскуолаларыттан барыта 358 кэриҥэ кыттааччы кэлбит, ол иһигэр 178 юниор баара биллэр. Саамай элбэх кыттааччы “Тыа хаһаайыстыбата, агрономия, биология, химия” сиэксийэтигэр баар. Ону кытары “Медицинэ, успуорт билимэ, чөл олох”, “Кыраайы үөрэтии, этнография уонна музееведение” сиэксийэлэригэр үгүс кыттааччы кэлбит. Аныгы олох сиэринэн аангылыйа тылынан үлэни көмүскүүр сиэксийэҕэ эмиэ аҕыйаҕа суох үөрэнээччи суруйтарбыт.

Кэмпириэнсийэ үлэтэ 16 сиэксийэнэн ыытылынна. Оҕолор үлэлэрин “Инникигэ хардыы” өрөспүүбүлүкэтээҕи түһүмэҕин эспиэрдиир хамыыһыйатын чилиэннэрэ сыаналаатылар. Эдэр чинчийээччилэр оруннаах сүбэни-аманы ылан, хайҕал тылын истэн, сыыһаларын-алҕастарын көннөрүөх буолан салгыы үлэлииргэ бэлэмнэрин эттилэр. Эспиэрдэр хамыыһыйаларын бэрэссэдээтэлинэн Ирина Владимировна Собакина, филология билимин хандьыдаата, Хотугулуу-Илиҥҥи норуоттар тылларын уонна култуураларын үнүстүүтүн дассыана, устудьуоннар чинчийэр үлэлэрин координатора, үлэлээтэ.

Сиэксийэлэринэн үлэ түмүгэ 5-8 уонна 9-11 кылаастарга тус-туспа таҕыста. Кыайыылаахтар добун суругунан наҕараадаланнылар.

Үүнэр көлүөнэни билим эйгэтигэр сыһыарар, оҕолор чинчийэр үлэҕэ дьоҕурдарын сайыннарар, өйүүр сыаллаах-соруктаах Саха Өрөспүүбүлүкэтин биир суолталаах тэрээһинин улуустааҕы түһүмэҕэ бу курдук таһаарыылаах буолла.

Добавить комментарий

Ваш e-mail не будет опубликован. Обязательные поля помечены *