Сыл бастыҥ учууталынан гимназия учуутала Кыыдаана Михайловна Екечьямова буолла

Новости

Алтынньы 24-25 күннэригэр С.К. Макаров аатынан Чурапчы гимназиятыгар улуустааҕы «Сыл бастыҥ учуутала-2019» куонкурус буолла. Бастыҥ учуутал диэн хайдах учууталы ааттыылларый? Биһиги санаабытыгар, идэтин толору баһылаабыт, киэҥ билиилээх, өркөн өйдөөх, талба талааннаах, эйэҕэс майгылаах, оҕолору ис сүрэҕиттэн таптыыр, кинилэри биэс тарбаҕын курдук билэр, өйдүүр, билиҥҥи олоҕу кытта тэҥҥэ хардыылыыр учууталы бастыҥ диэххэ сөп. Ол курдук, “Сыл бастыҥ учуутала-2019” куонкуруска идэлэрин олус таптыыр, оҕо туһугар олохторун анаабыт Мындаҕаайы, Хайахсыт, Чакыр, Улахан Күөл, Хатылы, Төлөй, Чурапчы орто оскуолалаларыттан уонна Чурапчы гимназиятыттан 11 бастыҥ учуутал кытынна. Бастакы күҥҥэ аһаҕас уруоктар, кылаас чаастара уонна бырайыак толкуйдааһын түһүмэҕэ ыытылыннылар.
Оттон бүгүн аһаҕас уруоктар салгыы буоллулар. Үрдүк таһымнаах уруоктарга оҕолор сөбүлээн үөрэннилэр. Учууталлар, хас биирдиилэрэ тиэмэлэрин толору арыйан, туруоруммут сыалларын ситистилэр.
Ону таһынан маастар кылаастары биэрдилэр. Кыттааччылар олус бэлэмнэнэн кэлбиттэрэ тута көстөр. Кэнчээри ыччаты иитиигэ-үөрэтиигэ сатабылларын, маастарыстыбаларын көрдөрдүлэр, үөрэтэр ньымаларын билиһиннэрдилэр.
Холобур, И.Е. Федосеев-Доосо аатынан Дириҥ орто оскуолатын учуутала Екатерина Васильевна Иванова тарбах эрчиллиилэрин оҥорторор туһатын кэпсээтэ. Чуолаан, саҥаралларыгар ыарырҕатар оҕолору дьарыктыыр наадатын сырдатта.
Хас биирдии уруогу, маастар кылааһы быһа эфиргэ көрдөрөн истилэр. Онон ким баҕалаах аактабай саалаҕа эбэтэр ахсааҥҥа анаммыт рекреацияҕа улахан экраҥҥа көрдө.
Куонкурус түөрт күн устата ыытылынна. Бу тыҥааһыннаах күннэр түмүктэринэн гимназиябыт учуутала Кыыдаана Михайловна Екечьямова бастыҥынан ааттанна. Кыыдаана Михайловна, эйигин үрдүк ситиһиигинэн ис сүрэхтэн киэн тутта эҕэрдэлиибит! Тус бэйэҕэр, дьиэ кэргэҥҥэр чэгиэн доруобуйаны, уостубат уйгуну, быстыбат быйаҥы баҕарабыт! Ыллыктаах санааҥ сатанан, оруннаах толкуйуҥ туолан, айбытыҥ-туппутуҥ табыллан иһиэхтин!

Добавить комментарий

Ваш e-mail не будет опубликован. Обязательные поля помечены *