Үтүө түмүктээх сүбэ мунньах

Новости

Балаҕан ыйын 11-12 күннэригэр Чурапчы улууһун үөрэҕин үлэһиттэрин үгэс буолбут сүбэ мунньахтара буолла. Икки күн устата ыччаппыт кэскилин кэҥэтэр, төлкөтүн түстүүр сыаллаах-соруктаах үөрэх туурдара, трек-сессиялэр тэрилиннилэр.

Балаҕан ыйын 12 күнүгэр үөрэх эйгэтин үлэһиттэрин сүбэ мунньахтарын пленарнай чааһа үрдүк таһаарыылаахтык ааста. Үөрүүлээх тэрээһин арыллыытын гимназия үөрэнээччилэрин хора (сал. Е.М. Лыткина) «Сахам сирэ» ырыанан, «Умсулҕан» кулууп уолаттара (сал. Ф.Н. Болдовская, С.Н. Гоголева) литературнай дьүһүйүүнэн киэргэттилэр.

Өссө биир долгутуулаах түгэнинэн кэнчээри ыччат туһугар сыралаах үлэлэригэр үрдүк көрдөрүүлээх учууталлары, уһуйааччылары чиэстээһин, наҕараадалааһын буолла. Биһиги гимназиябытыттан бары убаастыыр, таптыыр учууталбыт Ф.Н. Болдовская «СӨ учууталларын учууталлара» үрдүк бэлиэнэн наҕараадаланна. Эдэр эрчимнээх физкультура учуутала Т.В. Константинов «Саха сирин эрэлэ» бэлиэ хаһаайына буолла. Инники күөҥҥэ сылдьар учууталбыт П.П. Захаров «СӨ үөрэҕин систиэмэтин туйгуна» бэлиэнэн уонна улууспут үөрэҕин салалтатын бочуоттаах грамотатынан чиэстэннэ. Ону кытары кэскиллээх учууталларбыт Л.Р. Семенова, И.В. Сивцев Чурапчы улууһун үөрэҕин салалтатын бочуоттаах грамоталарын туттулар.

Күндү учууталларбытын, кэллиэгэлэрбитин үүнэр көлүөнэни сырдыкка сирдиир кыһамньылаах үлэҕит үрдүктүк сыаналаммытынан киэн тутта эҕэрдэлиибит! Инникитин даҕаны үлэҕит таһаарыылаах, махталлаах буола туруохтун! Тус олоххутугар, чугас дьоҥҥутутугар чэгиэн доруобуйаны, байылыат олоҕу баҕарабыт!

 

      

Добавить комментарий

Ваш e-mail не будет опубликован. Обязательные поля помечены *