Чурапчы улууһугар Спидкубинг чөмпүйэнээтэ тэрилиннэ

Новости

Муус устар 13 күнүгэр гимназия успуорт саалатыгар улуустааҕы Спидкубинг чөмпүйэнээтэ оҕо аймаҕы түмэ тарта. Саха Өрөспүүбүлүкэтин Спидкубинг Федерацията, С.К. Макаров аатынан Чурапчы гимназиятын уопсай тиэхэньическэй хаапыдыратын учууталлара уонна Дьокуускай куорат «JOY» маҕаһыына тэрийэн ыыттылар. Бириистэри «JOY» маҕаһыын уонна «Орто Дойду» экопарка туруордулар.

Спидкубинг успуорт ураты көрүҥүн быһыытынан биллэр, киһи илиитин, тарбахтарын былчыҥнарын, толкуйдуур дьоҕурун сайыннарар буолан дьон-сэргэ кэрэхсээн дьарыктанар. Онон чөмпүйэнээккэ улуус араас оскуолаларыттан 60 оҕо кэлэн кытынна.

Күрэхтэһии Аан дойдутааҕы кубик ассоциациятын (WCA) быраабылаларынан ыытылынна. Кубер оҕолор араас быһылаах кубик Рубиктары бириэмэҕэ хомуйдулар. Хамаанданан уонна биирдиилээн бастыыр иһин күрэхтэстилэр. Саамай кылгас бириэмэҕэ хомуйбут кубердар бастыҥнарынан ааттаннылар, грамоталарынан, сыаналаах бириистэринэн наҕараадаланнылар.

Хамаанданан күрэххэ С.К. Макаров аатынан Чурапчы гимназиятын 1 хомуур хамаандата 1 миэстэ буолары ситистэ (сал. К.М. Екечьямова). 2 миэстэҕэ А.С. Новгородов аатынан Чурапчы орто оскуолатын кырачаан кубердара (1-4 кылаастар) тахсан кыайыы өрөгөйүн биллилэр (сал. А.Н. Коркина). С.К. Макаров аатынан Чурапчы гимназиятын 2 хамаандата бочуоттаах 3 миэстэ буолла (сал. К.М. Екечьямова).

Бастыҥ көрдөрүүлээх оҕолор: Аман Сивцев, А.С. Новгородов аатынан Чурапчы орто оскуолата (1-4 кыл.), Дьулус Феофанов, С.К. Макаров аатынан Чурапчы гимназията (5-9 кыл.), Дьулурхан Дьоллоохов, С.К. Макаров аатынан Чурапчы гимназията (10-11 кыл.) «Орто Дойду» экопарка анал бирииһинэн наҕараадаланнылар.

Бары тэрийээччилэри, кыттыылаахтары, кыайыылаахтары истиҥник эҕэрдэлиибит! Спидкубинг успуорт ураты көрүҥэ оҕо аймах кэрэхсэбилин ыла турдун, сайдан истин.

 

Добавить комментарий

Ваш e-mail не будет опубликован. Обязательные поля помечены *